Lavurs
Spezialists e spezialistas per il mantegniment dal manaschi èn responsabels per las apparaturas en ed enturn ils edifizis. Per ordinari lavuran els tar instituziuns publicas, en lavuratoris communals, manaschis gronds ed instituziuns sco chasas da tgira, chasas d’uffants, scolas e centers da sport. Là èn els responsabels per il nettegiament ed il mantegniment dals edifizis, dals spazis verds e da las vias.
Las incumbensas dals spezialists per il mantegniment dal manaschi èn multifaras. Tut tenor accent sa spezialiseschan els en Accent servetsch da chasa u servetsch tecnic. Tar l' Accent servetsch da chasa lavuran els per gronda part endadens, tar l' Accent servetsch tecnic plitost ordadora. Spezialists dad omaduas accents s’occupan cun nettegiar ils edifizis e conturns, tgirar curtins e dismetter ruments.
Spezialists per il mantegniment dal manaschi en servetsch da chasa controlleschan e repareschan ils indrizs tecnics dals edifizis. Els midan la stuppadira da las fanestras, midan pairs electrics, remplazzan serradiras e segiranzas, controlleschan il stgaudament e las installaziuns electricas u reparan spinas d’aua che daguttan. Reparaturas pitschnas fan els sezs. Per cas difficils vegnan spezialists consultads. Tenor basegn fan els era lavurs da miradurs, da picturs e da scrinaris, repareschan p.ex. mobiglias e colureschan saivs.
Spezialists per il mantegniment dal manaschi en servetsch tecnic lavuran per ordinari ordadora. Tranter auter èn els responsabels per il mantegniment da construcziun. Quai vul dir ch’els mettan en urden donns vi dals edifizis e vi dal conturn. Uschia gidan els a mantegnair la valita dals edifizis e la segirezza da manaschi. Sper il conturn verd tgiran els era vias. Latiers tutgi da trair ora zerclim, bittar ora naiv e reparar donns en il catram.
Spezialists per il mantegniment dal manaschi dovran differentas maschinas e vehichels sco apparats a pressiun auta e segapastgets. Quellas maschinas vegnan mantegnidas e nettegiadas ed era reparaturas pitschnas vi da las maschinas fan els sezs.
Scolaziun
Basa legala
Ordinaziun federala 8-9-2014 (stan 1-1-2018)
Durada
3 onns
Accents
- servetsch da chasa
- servetsch tecnic
Furmaziun en la pratica
En in manaschi grond, en in’instituziun pli gronda (scola, chasa da tgira, chasa d’uffants, ospital etc.), ina vischnanca, in uffizi da construcziun bassa etc.
Furmaziun en scola
1 di per emna a la scola professiunala
Roms professiunals
- organisaziun da las lavurs
- segirezza a la lavur, protecziun da la sanadad e da l’ambient
- preparar ed exequir lavurs da nettegiar, dismetter rument e tgirar il curtin e spazi verd
- preparar ed exequir lavurs da mantegniment e da controlla sco era il mantegniment dals edifizis e reparaturas
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "spezialist / spezialista per il mantegniment dal manaschi AFQ"
Premissas
Furmaziun preliminara
- scola populara terminada
Pretensiuns
- inschign manual
- enclegientscha pratica e tecnica
- fidadadad
- movibilitad corporala e forza
Furmaziun supplementara
Curs
purschidas da scolas spezialisadas e professiunalas sco era da l’Associaziun professiunala mantegniment da manaschi (SFB)
Examen professiunal (EP)
pedel / pedella cun certificat professiunal federal u polier per il mantegniment da vias cun certificat professiunal federal
Examen professiunal superiur (EPS)
nettegiader diplomà / nettegiunza diplomada, mainamantegniment diplomà u manader / manadra Facility Management
Scola spezialisada superiura (SSS)
curs da furmaziun en champs spezials parentads, p.ex. manader / manadra da gestiun dipl. en Facility Management (SSS)
Scola auta spezialisada (SAS)
studis en champs spezials parentads, p.ex. Bachelor of Science (SAS) en Facility Management
Cundiziuns da lavur
Spezialists per il mantegniment dal manaschi lavuran en servetsch da chasa u en servetsch tecnic dad administraziun publicas, vischnancas, interpresas grondas u instituziuns sco ospitals, scolas, bogns ed auters implants da sport.
Ulteriuras infurmaziuns
SFB - Schweizerischer
Fachverband Betriebsunterhalt
Postfach
3076 Worb
Tel: +41 77 485 43 42
URL: www.betriebsunterhalt.ch